ميدو عن أزمة شريفة ماهر: يوم القيامة قرب

علق أحمد حسام ميدو، لاعب نادي الزمالك ومنتخب مصر السابق، على أزمة الفنانة شريفة ماهر مع أولادها.

وغرد ميدو من خلال حسابه الشخصي تويتر: “انا مش فاهم ازاي الناس جاحدين على أهلهم كده؟؟ في حاجه حصلت!! يوم القيامه قرب!! والناس بتتجوز سنين ويتطلقوا ويطلعوا يفضحوا بعض.. هل ده اصبح العادي في مصر؟ اكيد في حاجه غلط”. 

بكاء شريفة ماهر

بكت الفنانة شريفة ماهر، على الهواء، خلال حوارها مع الإعلامية بسمة وهبة مقدمة برنامج «90 دقيقة» على قناة «المحور»،، بعدما أجرت مقدمة البرنامج مداخلة هاتفية مع ابنها الذي اتهمته بضربها وسبها والاستيلاء على أملاكها مستغلا قلة حيلتها وضعف نظرها.

وقالت شريفة ماهر، إنه : «الله لا يكسبك يا بعيد، ورينا الأوراق مش الكلام أنا مش مضيت لك على حاجة، انت اللي مضيتني، أنت سلطت البواب عليّ وبيقوله ميجيبليش حاجة وبيقول للناس إن عندي زهايمر، حسبي الله ونعم الوكيل فيك، ربنا ينتقم منك».

ورد عليها، قائلًا: «عارف إن الجنة تحت أقدام الأمهات، مش ممكن أشتمها وايدي تتقطع قبل ما أمدها، لكني اشتريت الشقق اللي عليها المشكلة وعامل صحة توقيع منذ 2007 والمهندس الذي بنى العمارة معها شهد على هذه العقود».

شريفة ماهر تتهم نجلها بالتزوير 

لترد عليه: «مزورة وهسجنك»، وعقب، قائلًا: «بتقول بايعة لبنتها منذ عام 2011، وازاي هغير عقد البيع اللي هي بايعاه، اديتها فوق المليون جنيه وفوق الـ100 ألف جنيه سمسرة في الفيلا التي باعتها».

وصرخت الفنانة شريفة ماهر في وجهه، قائلةً: «يا كداب، انت بتصلي انت؟! انت كداب وضلالي ربنا ينتقدم منك يا بعيد وربنا يوريني فيك يا بعيد ربنا هينتقم منك يا بعيد  يا حرامي».

وأكد شريف، أن أمه حررت محضرا ضده واتهمته فيه بالضرب والشتم وكسر الشقة دون وجود أي إصابات، وهو ما يتضارب مع روايتها الآن التي تقول فيها إنه تسبب في كسر ذراعها منذ 4 سنوات، موضحًا أن النيابة حفظت المحضر.

وأتم: «باعت شقتي لحد تاني ومرضتش أعمل محضر فيها ولحد الشهر اللي فات بعتلها لحمة وفراخ وأرز ومكرونة وببعتلها مؤن تكفيها شهر كامل»، لترد عليه والدته: «رمتهم».