ظهر الدكتورمبروك عطية، أستاذ الشريعة الإسلامية بجامعة الأزهر الشريف، في فيديو بث مباشر له على صفحته الرسمية بموقع التواصل الاجتماعي فيسبوك بعد إجرائه عملية لبتر أحد أصابع قدميه، للرد على تعليق رآه من إحدى الفتيات على السوشيال ميديا عن شهر رمضان.

وقال الدكتور مبروك عطية" أنا مش بدخل الحقيقة لأني متعب جدًا، إلا للشديد القوي اللي خلاني أدخل حالًا وأنا يعلم ربنا بحالي،كلمة قالتها إحدى الفضليات.. أيها الشهر ترفق ومتسبناش إلا وربنا غفر لنا".

وأضاف "يعني يعمل إيه الشهر، يبقى سنة، مينفعش يمشي إلا لما ربنا يعتق رقابنا.. فيه فكر يقول كده.. مفيش دين بيقول كده، حديث الرسول عليه أفضل الصلاة والسلام بيقول .."صوموا لرؤيته وأفطروا لرؤيته".. فاحنا علينا نبطل العواطف الكدابة اللي ممكن تبوظ الدين.

وتابع مبروك عطية "يترفق يعمل إيه الشهر، هو بإيديه إيه، الله خالق الليل والنهار، وربنا سماه أيام معدودات، وإحنا مش هنكلمه، إحنا مبنكلمش الأيام، الأيام لا تعقل، ولكن العمل اللي فيها يا إما يُعقل أو لا يُعقل، إما يُقبل أو لا يُقبل، فإحنا دورنا نسأل ربنا السلامة، ونقول اللهم كما بلغتنا رمضان لا تخرجنا منه إلا وقد غفرت لنا ذنوبنا، ونقلب الصفحة الله يرضى عنكم وتكونوا فهمتوا حاجة من الكلمة اللي دخلت علشانها.. ووجعتني دي".