انفعل عمرو أديب، على الهواء مباشرة فى برنامجه "الحكاية " المذاع على فضائيةmbcمصر ومنصة شاهد، على الفنان محمد رمضان بعد وفاة كابتن طيار أشرف أبو اليسر،قائلا: ربنا مش هيسيبك لأن الخير اللى انت عملته مع الطيار والشاب اللى اتصاب وهو بيصور معاك هيتردلك.

تابع عمرو أديب، أن الخير اللى انت عملته واستفزيت بيه الشعب المصرى كله لما رميت الفلوس فى المايه ..ده انت أسأت حتى للراجل بعد ما مات ورايح تنزل صورة له مع عمرو دياب ودينا الشربينى.

أكد "أديب"،مشهد الطيار وهو على سرير المستشفى وبيموت عمرك ما هتنساه يا محمد رمضان وربك كبير ..أنت دائما بتحب السوشيال ميديا وبتحب التريندات ..أهو انت طلعت أهو بس والناس كرهاك.

أردف "أديب"، ان الناس فى البلد مش هبلة وأكيد عارفة أنك عظيم ..والله لو طلعت فى مسلسل وانت عامل أدهم الشرقاوى محدش هيتفرج عليك، وتابع قائلا: نفسى تقرأ كل الكومنتات اللى مكتوب عنك النهارده ، والله أنا عمال اقرا الثانى والثالث ومن كترها قفلت الكومنتات.

واكمل قائلا:ربنا يدى كل واحد على قد نيته وطبعا أنت شايف الأيام اللى فاتت عاملة ازاى ولسه اللى جاى عليك هيبقى أشد، وربنا يجعل كل دعا من نصيبك وروح اعمل فيديو تاني وهرفع عليك قضية.