الإشراف العام
إلهام أبو الفتح
رئيس التحرير
أحمــد صبـري
الإشراف العام
إلهام أبو الفتح
رئيس التحرير
أحمــد صبـري

محمد ماهر يكتب: الكورتيزون.. الوحش الطيب

صدى البلد

"لا يا دكتور بلاش تكتبلى كورتيزون"

غالبا دى الجملة اللى بيسمعها الطبيب عند كتابة الكورتيزون لأى مريض.وعلى الرغم من الأعراض الجانبية الكتير للكورتيزون إلا إنه بيعتبر من رحمة ربنا.

أولا الكورتيزون هو هرمون طبيعى بيتفرز من الغدة الفوق كلوية.ليه وظايف كتير انه بيساعد فى التحكم فى حرق وتصنيع العناصر الغذائية بالجسم والتحكم فى كمية المياة والاملاح وضبط نسبة السكر بالدم ومضاد طبيعى للالتهابات وبيساعد الجسم فى اوقات الخطر بانه يحافظ على ضغط الدم ومستوى السكر والأملاح والمناعة.ولو نقص بيسبب مرض "أديسون" اللى فيه بيحصل هبوط فى الضغط ونقص بسكر الدم ونقص بدرجة حرارة الجسم وقد يؤدى للغيبوبة او الوفاة.

ولأن الكورتيزون ليه دور رهيب فى القضاء على الالتهابات فبيتم استخدامه فى الأمراض الالتهابية وخصوصا الشديدة.فبيتم اخذه  بالفم او عن طريق الحقن فى امراض المناعة الذاتية وملوش بديل فى انقاذ العصب البصرى أو الكليتين فى امراض التهابات العصب البصرى أو الكليتين المناعية فبيحمينا من العمى أو الفشل الكلوى مثلا.الروماتويد المفصلى والذئبة الحمراء.أمراض الاعصاب المناعية زى مرض التصلب المتعدد بيكون الكورتيزون دواء اساسيا فى حماية الجهاز العصبي.وفى حالات الربو الشعبى والتهابات الجهاز التنفسي والتليف الرئوى.والتهابات الجهاز الهضمى زى القولون التقرحي.وأمراض الحساسية الشديدة.وبيتاخد كعلاج موضعى فى التهابات الجلد او الارتيكاريا.أو عن طريق البخاخات فى حساسية الصدر.

لكن الأمر ما يسلمش.الكورتيزون فعلا له أعراض جانبية زى زيادة الوزن والتهابات المعدة وارتفاع ضغط وسكر الدم وهشاشة العظام.لكن لأن معظم الأمراض اللى بيتاخد فيها الكورتيزون أمراض خطيرة.ولان الكورتيزون بيبقى لانقاذ حياة المريض أو حمايته من مضاعفات خطيرة بيتم إعطاء الكورتيزون مع أخذ الاحتياطات.اهمها الجرعة الدقيقة لتلافى اعطاء جرعة كبيرة ووضع خطة لإيقاف الكورتيزون لان ايقاف الكورتيزون بطريقة فجائية ممكن يسبب أعراض مرض "أديسون"اللى تم ذكرها سابقا.مع اعطاء المريض ادوية لحماية المعدة من الالتهابات.مع اعطاء الكالسيوم وفيتامين دال مع عمل اختبار هشاشة للمرضى اللى بيتعاطوا جرعات عالية لفترات طويلة من الكورتيزون واعطائهم ادوية الحماية اللازمة مع تقليل الملح فى الطعام لأقل كمية ومحاولة اتباع حمية غذائية لتلافى زيادة الوزن.مع مراقبة ضغط الدم والسكر فى مرضى الضغط المرتفع ومرضى السكر بدقة وتصحيح جرعات الأدوية.

وغالبا فى معظم الحالات جرعة الكورتيزون بتبقى قليلة وفترة قصيرة بيكون الأعراض الجانبية للكورتيزون شبه منعدمة.وعلشان كده الكورتيزون وحش شرير ضد الأمراض لكنه طيب وبيحمى الجسم من الأخطار إذا تم التعامل معاه بشكل صحيح لتجنب أى عرض جانبي ليه.