إيه اللى يحصل لو أقرب صديق ليك واللى عارف كل اسرارك وكل نقط ضعفك ينقلب عليك وبدل ما يدافع عنك يحاربك؟؟؟كارثة مش كده؟

ده بالظبط اللى بيحصل لو الجهاز المناعى للجسم بدل ما يدافع عن جسمك ضد الاخطار من ميكروبات وأمراض وأورام يهاجم خلايا وأجهزة الجسم السليمة ويسبب أمراض ليها ويمكن تدميرها.

ولأن الخلايا المناعية موجودة فى الدم فأى حتة فى جسم الإنسان بيوصلها دم معرضة انها تتصاب وتدمر لو حصل مرض مناعى.سواء المفاصل أو الكلى أو الجهاز العصبى أوالأوعية الدموية أو المفاصل وحتى الجلد والشعر.

وأشهر أمراض المناعة الذاتية هو مرض الذئبة الحمراء اللى بيصيب أى جهاز من اجهزة الجسم بلا استثناء وبيكون نسبته أكثر بين النساء عن الرجال.والذئبة الحمراء مشهورة بتأثيرها على الجلد.فبتسبب طفح جلدى فى الوجه على الخدين وحساسية جلدية شديدة من الشمس وتساقط شديد فى الشعر.بس ده مش اخطر حاجة. أخطر حاجة لو أثرت على الكليتين ممكن تعمل التهاب شديد بالكليتين قد يصل إلى الفشل الكلوى لو ما اتعالجش.او الجهاز العصبى والمخ او القلب او كرات الدم الحمرا فتسبب أنيميا شديدة او الصفائح الدموية المسؤولة عن ايقاف النزيف او المفاصل فتعمل آلام والتهابات بالمفاصل وبيكون فى أحيان كتيرة مصاحب ليها ارتفاع فى درجة الحرارة.

ومن الأمراض المناعية الشهيرة أيضا مرض الروماتويد المفصلى واللى تأثيره بيكون بشكل أساسي على المفاصل وخصوصا المفاصل الصغيرة لليدين والقدمين فبيسبب التهاب مناعى فى المفاصل فى شكل تورم واحمرار وسخونة وتيبس فى المفاصل وخصوصا فى الساعات الأولى من الصباح عند القيام من النوم وبيتحسن الألم مع الحركة تدريجيا.

السؤال دلوقتى امتى أشك إن عندى مرض مناعى؟

لو فيه التهاب فى المفاصل او الفقرات مش مجرد ألم.يعنى الألم بيكون أكثر عند القيام من النوم وبيتحسن بالحركة والمجهود وبيكون مصاحب ليه تورم فى المفاصل مع صعوبة فى تحريكها او انيميا او نقص فى كرات الدم البيضا أو نقص فى الصفايح بيسبب نزيف او بقع حمراء تحت الجلد بحجم رأس الدبوس أو اكبر شوية.وخصوصا لو معاهم ارتفاع فى درجة حرارة الجسم أو طفح جلدى على الوجه أو تساقط فى الشعر من الخصل.

لو فيه تغيير فى لون اطراف الأصابع عند التعرض للبرد مصاحب ليها ألم شديد.

لو فيه قرح متكررة فى الفم مصاحب ليها التهابات فى العين.