EN
أن تذهب الى قسم البوليس وتبلغ عن سارق او قاتل او نصاب او أى حادثة او واقعة، فهذا حق كفله لك الدستور فى اى دولة من دول العالم، ولكن ان تذهب الى القسم لكى تبلغ عن غش وخداع فى الصنف الذى تتعاطاه فهنا الحدث والحديث. لم تكن هذه الكلمات لى بل كانت لمأمور احد الاقسام وهو صديق لى تربطنى به صداقة منذ زمن بعيد.
وهو من الرجال الذين تعاهدوا وعاهدوا الله على الاستقامة والعدل مهما وصلت بهم المناصب والترقيات ، حدثنى وهو فى حالة يصعب تصنيفها فهو ليس بضاحك ولا باكٍ ولكنه مصدوم ، مندهش، لا تعلم بالضبط كيف يشعر الا انه مصر على ان يقص حكاية الشاب الذى جعله يخرج من مكتبه على صوته المرتفع وعلى محاولة الضباط على صرفه بالحسنى؛ ويقابله اصرار من الشباب على استخدام حقه القانونى فى التبليغ عمن نصب عليه، ويواصل صديقى المأمور حديثه ويقول"عندما نظرت الى الشاب وهو عشرينى العمر لمحت انه ابن ناس كما يقولون ورأيت ايضا انه فى حالة غير طبيعية، وعليه فاصطحبته الى مكتبى وطلبت له قهوة سادة حتى اجعله يفيق ان صح حدسى بأنه متعاطى شىء ما.
وسألته عن اسمه فقال لى "فادى " وحينها قلت له.. طب ياعم فادى "مالك خير مزهق الظباط ليه حد مزعلك"؟ فقال لى على الفور "اقسم بالله ابدا انا يا باشا هاحكيلك الحكاية، انا الحمد لله مقتدر واهلى اثرياء، وانا بادرس فى كلية مرموقة، وابويا وامى بيشتغلوا فى الخليج، وعايش فى فيلا فى التجمع لوحدى واخواتى عايشين مع اهلى فى الخليج، وأنا هنا عشان الدراسة وهمه بييجوا وانا باروحلهم فى الاجازة"..
طب ماانت زى الفل اهه ايه بأه اللى جابك القسم ؟هذا سؤالى له الذى قابله بابتسامة بلهاء وقال" ياباشا انا زى اى شاب بيحب يعمل دماغ ساعات آخد برشام وساعات بانجو واخيرا صحابى دلونى ع الحشيش وبصراحة اتكيفت منه" واستكمل حواره الطويل قائلا "وباتعامل مع ديللر محترم بيجيب افضل الانواع" ..تمام كده ياباشا: فأجبته باشارة من يدى تعنى تمام وانجز.
رد "من رمضان اللى فات ياباشا راح قافل موبايله واحنا اتعذبنا وجه يوم الوقفه وربنا كرمه وفتح الموبايل واعتذر لينا بانه كان صايم ومينفعش يغضب ربنا ويعمل حاجه حرام .وبصراحة احنا احترمناه اكتر وجه بعدها قالنا فى نفس المكالمة ان الانواع كلها غليت وضرب السعر فى اتنين وقال ان معاه نوع حكاية بس غالى اوى"..بالطبع انا وصحابى مترددناش لحظه ووافقنا على طول انه يجيبلنا من النوع الحكاية وخدنا منه بالسعر اللى طلبه ..وياباشا بعد مشربته ولا اى اثر وزى ماانا!!! فحضرتك ديه قضية غش ونصب وانا عايز ابلغ ..
قلتله حقك بس انت عارف انك كده بتحط نفسك فى قضية .قالى ماشى بس آخد حقى. قلت خلاص ادينا اسمه وعنوانه ورقمه واحنا هنقبض عليه بس يكون متلبس. وصرفته من مكتبى مطالبا الضباط بعمل محضر بأقواله واثبات واحضار الديلر؛ واخذنى الفضول لان اكون معهم فى ضبط الديلر ولا أدرى ما سبب ذلك .
وبالفعل ذهبنا الى حيث عنوان المبلغ عنه متخفين وهناك فى مكان راق جدا فيما يسمونه بالكومبوند دخلنا ويبدو ان حارس العقار على علم بطبيعة عمل المبلغ عنه فهو لايسأل فقط يشاور اليك بأن تجلس فى الريسبشن لتنتظر سيده الذى يغيب لدقائق فى احدى الغرف ثم يخرج ويعطى السائلين مايطلبون من انواع لعمل دماغ كما يقولون.
ولما رآنى قال لى: اؤمر قلتله احنا جداد فى الصنف وعايزين حاجة حلوة كده زى ماقالولنا ان انت الملك..
ضحك ورد متبسما .يابيه المهنة ديه سمعة وانا ولله الحمد محافظ على سمعتى زى الجنيه الدهب... ولم يكمل كلامه ؛واذا بنا نرى صاحب البلاغ وهو يقول للديلر ياباشا انا عايز ابلغ عن الديللر اللى غشنى ياباشا انا مواطن وليا حقوق ولازم تقفوا جنبى ..وهنا التفت اليه الديللر وقال له "ابوس ايدك انا مش ظابط انا اللى باديك المدعوق اللى شربته ..ارحمنى وروح بلغ عنى ..والله حرام، انت هتخلينى اتوب عن المهنة ويتخرب بيتى واقعد اقشر بصل ..اسمعنى انت من يوم مااديتك النوع الجديد وانت كل شوية تيجى وتتعامل معايا على انى ظابط وعايزنى اقبض على نفسى ..ارحمنى الله يرحمك هااوصلك بنفسى لاقرب قسم عشان تروح تبلغ عنى وتحل عن سمايا... ولم نتمالك انفسنا من الضحك واشترينا منه وخرجنا ونحن فى حالة من اللاوعى حتى عدنا الى مكاتبنا وكل منا ينظر الى الاخر ويسأل لماذا لم نقبض على الديللر !!!!؟؟؟؟
