هشام النعال يكتب: نفسى أكون كائن حى

نفسى اكون كائن حى
نفسى اقول كلمة اى
نفسى امس النار
يطربنى الكى
ولا يهمنى اتحرق
اتفلق
اية الفرق بين الجماد والحى ؟
..................
نفسى فى الضلمة ادور على النور
من غير ما اتخنق
نفسى اشوف الظلم اعرف اثور
من غير ما اتحرق
وان قابلنى الزور فى سكة
اعرف عنه افترق
نفسى اكسر نظرة غرور
فى عيون واد مرق
نفسى اكون واد فهلوى
واد حدق
نفسى اسرق واتسرق
ووقت الخوف
اعرف اشوف
من غير ما اتخطف
بهمسة شيطان
بطعنة جبان
فى غصن بان
دمه نزف
بكلمة شرف
صابها القرف
نفسى اكون كائن حى
اقوم واقف
ادوب تلال الجمود
بكلمة اى
احطم شعور جلمود
يصبح حى
الملم خيوط الليل
اسرسب بذور الضى
ااذن فى قلب الشيطان
يمكن يبطل فى ودان البشر غى
نفسى اكون كائن حى.